الثلاثاء، سبتمبر ١٢، ٢٠٠٦

ولد و لاّ بنت

الكل يتمنى أن يُرزق بولد و ليس ولد واحد لكن أكثر من ولد و كلما زداد عدد الأولاد زدات السعادة و الفخر و الاعتزاز, أما البنات فيكفى واحدة فقط (لزوم التنويع) . سيدات تعدت الأربعين و قد رزقها الله بولد و لكن لم تكتفى به لابد من أخ له, سبحان الله عندها الولد و البنت و لكن تفضل أخ للولد و ليست أخت للبنت( يعنى مش مهم البنت تكون وحيدة لكن الولد لا يمكن أبداً) و يا سلام على أبو البنات الذى لو يًرزق بولد و الله تكاد الناس تعزيه فى حاله, و يسموا أبو البنات, أبو البنات راح أبو البنات جه, لا حول و لا قوة إلا بالله يعنى الراجل عشان كانت خلفته كلها بنات الناس لغوا اسمه و منحوا اسم جديد زى أبو قردان و لا أبو فصادة ( يا مخلف البنات يا شايل الهم للممات) أما الأسر التى لديها ولد واحد يكاد الأب و الأم يعملوا تمثال للولد و يعملوا رجل البيت و هو عنده عشر سنين و يميزوا جداً فى المعاملة و كلمته لازم تمشى على أخواته البنات....حتى الأمهات علماً أن بناتها بيبقوا حنينين عليها جداً إلا أنها تفضل ابنها عليهن..... يا عينى على البنات ألطف الكائنات!!!!!! الواحد عمروا ما شاف أب و أم نفسهم فى بنتين أبداً يقولوا كفاية واحدة( خليها مصيبة واحدة أحسن يبقوا مصيبتين) و لو الواحد كا ن فى عزومة عند أسرة من اللى عندهم عنتر واحد تلقى الأم ناقص تأكل بأيدها وهو كبير زى الشحط أما البنات ياكلوا و لا يتفرجوا مش مهم خلاص. بس أنا بينى و بين نفسى اكتشفت أن الولد له مميزات أكتر من البنت طبعاً مش خلقية أنه لا قدّر الله أذكى و لا أعقل !!! لكن يكفى أنهم ميتخفيش عليهم و يقدروا يعتمدوا على أنفسهم, يعنى يقدروا يشتغلوا فى أى مكان بعيد و يتغربوا, حتى الأب لما بيتوفى لما يكون سايب أولاد غير خلاص لما يكون سايب بنات, بالاضافة أ ن يقدروا يسبوه فى الصحرا فى الغابة أى مكان هيمشى نفسه فيه و الأهم من كل ده الميراث و أن هيشيل اسم العيلة الكريمة و يرفعوا لسابع سما!!! و لا لو واحدة كان نصيبها تتجوز واحد من اللى مفيش غيره فى الأسرة ياعينى الست الولدة ما بتقدرش تستوعب أنها بقت درجة تانية و أن المدام الجديدة هى الأولى, تقعد لها على الواحدة و يبقى نهارها أسود ان شاء الله لو زعلت المحروس, بصراحة مجتمعاتنا فيها حاجات غريبة أوى الواحد لو هيكتب عن كل اللى بيشوفوا فى حياته, تقريباً هيقضى عمره يدون و يكتب العجب و العجاب. استكمالاً للحلقة الأولى من سلسلة الخاتمة المانجوية للتدوينات العصيرية كالآتى: أفضل أنواع المانجو هو العويسى و الكوبنية طبعاً العويسى للأكل متعملش عصير, أما الكوبنية تتعمل عصير أو تتاكل حسب الرغبة و أحسن مانجو تلقيها فى الاسماعيلية و الشرقية, و حيث أن البلاد تعانى من موجة هبوط حاد فى أسعار المانجو نتيجة أن مؤشر كايس المانجوى فقد مائة نقطة, قربوا يبيعوا المانجو ببلاش فى الشوارع فيرجى شراء أسهم مانجوية على قدر الاستطاعة و تخزينها لحين ارتفاع الاسعار و بعدين نشربها فى رمضان بدل القمر الدين و كل عام و أنتم طيبين

هناك ٨ تعليقات:

Abdelrahman M يقول...

أرد .. :)
وانتي طيبه يا أستاذه ..
أنا برد هنا نيابة عن كل التدوينات اللي فاتت واللي مقريتهاش .. عجبتني كتير اوي .. فعلا بحييكي على المدونه دي ..
----
" انشاء الله " غير " ان شاء الله " خااااالص :D
بس كده
سلام عليكم
عبدالرحمن

safa يقول...

متشكرين على التصحيح و هروح أصلحها بسرعة, شكراً

غير معرف يقول...

ممكن تصحيح تاني من عبد الرحمن تاني؟

لا حول الله .. ياريت تبقى لا حول الا بالله او يا حول الله

مبسوط ان حضرتك استكملتي مسيرة المانجو ، بالنسبة للولد والبنت .. بالنسبة لي على اد ما بتمنى ربنا يرزقني ببنت على اد ما بخاف من اليوم اللي ازفها فيه لواحد تاني ياخدها مني

حب تملك ذكوري متخلف :)

مفلس افندى الرايق يقول...

انا هتشرى اتنين كيلو اسهم مانجو من البرصه اللى على اول شارعنا بس ياريت العربجى مايستغلش الفرصه ويقولى سوق المال ارتفع والسعر وصل لحد ادنى 5 جنيه

المانجوية للتدوينات العصيرية

تلاقي فيها جميع الحلويات يا عينيه

وممكن نعملك حلو رز بلبن ومهلبيه

ازيك؟

safa يقول...

برضه متشكرين تانى على التصحيح الخفيف, بلاش من أصله تجوزها, خليها قعدالك أحسن و أوفر

safa يقول...

شكراً يا أستاذ مفلس على المرور الكريم

Abd El Rahman Gado يقول...

يافندم

ده تصحيح بجد

لا حول الله يعنى الراجل عشان كانت خلفته كلها بنات الناس لغوا اسمه


طيب انا غلطان يا ستي

safa يقول...

ما أنا صححتها خلاص